尋晚曼聯對華歷簡奴嘅熱身賽，C朗都有踢半場，不過未完場就因為交通問題，同迪基亞、般奴、馬迪爾等獲坦克批准下一齊提早離場。離英超開鑼不足一個星期，C朗今朝凌晨喺IG出po話「Happy to be back」，唔通真係有彎轉？
經過「因家事」延遲歸隊操練、要求轉會，但被曼聯極力挽留後，C朗終於返回奧脫福參加集訓，星期日熱身賽對華歷簡奴前，佢喺Twitter貼出「王者周日歸來」，表面上一切已雨過天青。
尋晚對華歴簡奴，C朗正選登場，賽前介紹球員時，佢依然得到最多歡呼聲，其實睇好多唔同地方嘅曼迷page或group，好多曼迷都冇乜嬲，亦唔介意佢離隊。
曼聯今仗出唔少新人，C朗打最前，中場正選有艾歷臣、雲迪碧克，新中堅利辛度馬天尼斯亦打正選。
C朗狀態當然未足，但仍勤於跑動，有次左路近射斜出，上半場完成後，佢係唯一被換走球員。入替佢嘅小將阿密特迪亞路，下半場3分鐘即入波，但稍後華歷簡奴扳平，雙方1:1完場。
場波冇乜特別，但就又有花生。C朗被影到喺曼聯主帥坦哈格趁「飲水時間」講解戰術時，面口揦埋一舊，跟手又畀人影到，場熱身賽未踢完，佢已經拎袋離開奧脫福。
係咪揦口揦面就見仁見智喇，但其實早走嘅真正原因係交通問題，佢同幾位球員包括般奴費南迪斯、迪基亞、馬迪爾、達洛治等一齊提早離場，而且係得到坦克格許可，可惜C朗係話題人物，無可避免地被傳媒大造文章。
今個星期日，曼聯就會喺英超開鑼戰主場對白禮頓，C朗去向仍然未明朗，尋晚場波嘅是非，佢只係喺IG話「Happy to be back」。事實擺在眼前，佢想離隊但冇大球會敢要佢，依家傳緊佢考慮拿玻里或返士砵亭，筆者非曼迷，但平心而論，留番喺曼聯、同坦克一齊搏吓下季入前4，似乎係較明智選擇。
