繼利物浦、阿仙奴後，曼聯再一次於主場砌低Big 6強隊！周四凌晨英超快車，紅魔以壓倒性姿態2:0挫熱刺。拉舒福特打正選，明顯效果更好，冇份出場嘅C朗，未完場已返入更衣室，賽後坦哈格揚言會「處理呢個問題」。
以為勢均力敵，點知徹底一面倒。曼聯出番拉舒福特做單箭頭，C朗打後備，發揮番坦哈格逼搶戰術嘅最佳效果，攻到熱刺蜂冚。
上半場，曼聯剩係外圍遠射已經有14次，平球會2003-04年球季後單場紀錄，熱剌門將洛里斯忙到甩碌。
上季熱刺作客奧脫福輸2:3，當時干地話只係輸畀連中3元嘅C朗，但今次更輸得徹底，全隊精神面貌同發揮，遠遠不及曼聯，孫興民、哈利卡尼，都未能製造威脅。
上半場狂攻唔入，但換邊後兩分鐘，費特一次禁區外施射改變方向，收死失咗位嘅洛里斯，而般奴費南迪斯69分鐘射成2:0完場。
C朗今仗唔只做後備，更加係完全無出場機會，佢被電視台影到，89分鐘已提前離開球場返更衣室。曼聯主帥坦哈格賽後受訪，亦揚言會「處理」呢個問題：「我見到佢早走，我冇同佢傾過偈，今日我想慶祝贏波先，聽日先處理(C朗)呢件事。」
同晚賽事，準Big 7紐卡素積分緊貼曼聯，由米基爾阿米朗入波，主場1:0挫愛華頓，已保持6戰不敗走勢，穩守第6位。
車路士作客0:0和賓福特，門將阿列沙巴拿加繼對維拉力挽狂瀾後，今場又救出幾個險球，已連續5埸保持不失。領隊樸達上車後依然未輸過，但賽前有壞消息，中場主力簡迪決定開刀根治傷患，將缺陣4個月。
經過周中快車，利物浦1:0挫韋斯咸，升上第7位後，正路前7已全部歸位，嚟緊冠軍、歐聯、歐霸席位，睇嚟都會係佢哋爭逐。
英超前7名排位
1）阿仙奴 10戰 27分
2）曼城 10戰 23分
3）熱刺 11戰 23分
4）車路士 10戰 20分
5）曼聯 10戰 19分
6）紐卡素 11戰 18分
7）利物浦 10戰 16分
