【英超】狂怒!球證補時吹停曼城單刀!3:3和熱刺 夏蘭特連環爆粗有手尾跟

曼城神鋒夏蘭特周日大爆發,但唔係入波,係抗議球證低級執法錯誤,賽後更喺網上爆粗繼續鬧球證,可能有手尾跟。

又唔怪得夏蘭特咁燥,佢喺3:3賽和熱刺呢場波,補時階段自己被侵犯後,繼續hold到個波,仲妙傳畀基亞利殊單刀,球證居然喺呢個時候先吹熱刺犯規,令「得益」嘅係犯規嘅熱刺。

夏L變身挪威怒漢,對住球證賀柏大叫:「Fuck off」!離開球場嗰陣,熱刺中場盧施素仲專登用手臂撞夏L,再次令呢位球星爆發,回身走上前準備開拖,好彩被隊友分開咗。

夏蘭特怒氣未消,繼續喺社交平台X播放整條誤判片段,仲寫上:「Wtf」三個英文大字,態度明確,相信呢件事會有下文,估計夏L將難逃處分。

直接Wtf!

又難怪夏蘭特咁㷫,球證喺單刀先嚟吹停場波,的確好難令球迷信服,不過主隊曼城亦要怪吓自己,錯失大量入波餐士,包括中兩次柱、夏蘭特嘥咗黃金機會,最終導致3連和。

今場大戰係瘋狂入球騷,孫興民喺6分鐘狂奔勁射破網,但3分鐘後佢擺烏龍,曼城扳平後,再喺31分鐘以一個超美妙組織,由科頓射成2:1。

曼城錯失多個拋離紀錄嘅機會,69分鐘,熱刺中場盧施素追和2:2。基亞利殊喺完場前9分鐘,接應夏L傳送射成3:2,以為大局已定,但古路施夫斯基喺補時階段頂成3:3,注定曼城賽和車路士、利物浦後,連續第3場和波。

曼城呢期賽程堅惡啃,周中快車要作客超級黑馬、穩守第4位嘅阿士東維拉,隨時又會失分。曼城目前排第3,落後榜首阿仙奴3分。熱刺排第5,少阿仙奴6分。