被譏為第一水貨，達雲紐尼斯頂住壓力，取得加盟後第一個主場士哥，助利物浦1:0小勝韋斯咸。烏拉圭神鋒今仗表現醒神，同之前確係唔同，關鍵係紅軍轉換陣式。
先傷路爾斯戴亞斯，上仗冇埋迪亞哥祖達，利物浦焗住放棄三前鋒陣式，用達雲紐尼斯、法明奴打雙箭頭，沙拿縮後右中場，少有正選機會卡維奴法比奧，亦上陣做左中場。
上半場效果唔錯，基本搶贏中場，製造唔少攻勢，大家最關心係達雲紐尼斯表現，雙箭頭打法直接，唔似三前鋒講究高度配合力，簡簡單單先適合佢，踢落有板有眼，22分鐘更接應森美卡斯傳中，跳頂破網。
加盟利物浦後，達雲紐尼斯有5入球1助攻，但呢個頭槌，先係佢第一次喺晏菲路主場入波。
達雲紐尼斯上半場好多射門機會，40分鐘射中柱，未能拉開紀錄，完半場更幾乎被扳平。44分鐘，韋斯咸罕有進攻，祖高美斯犯錯，韋斯咸逼得12碼，可惜查洛保雲主射宴客，畀艾利臣比加撲出。
下半場利物浦仲有唔少入波機會，但始終未能攞到燕梳球，全場14次射門，都只係入得1球。反而尾段畀韋斯咸有唔少扳平機會，最危險一球，又係阿歷山大阿諾特甩晒位，蘇錫克有機會近門起腳，睇怕必入，瀕死時刻大佬救駕，占士米拿精彩解圍，保住勝局。
防線重心雲迪積克，第70次英超主場上陣，繼續保持不敗金身，實在厲害。利物浦二連勝，10戰16分升上第7位，周六早場作客對森林，有力繼續攀上聯賽榜更前位置。
