愛恨往往係最強動力！白禮頓一眾戰將發揮超高水準，加上主隊球迷極落力打氣，白禮頓周六英超主場4:1大勝車路士，重擊首度倒戈嘅前領隊樸達，令佢未能創造不敗歷史。
今年9月9號，樸達宣布離開已効力3季嘅白禮頓，轉投車路士，並帶走整個教練團。雖然佢曾公開致歉，指自己要把握難得嘅機會，但難消白禮頓球迷心中恨意，今場勁向佢同古古列拿開汽水。
球員亦如是，大踢爭氣波，一開波即發揮超強速度及壓迫力，令車路士後防大亂。開賽3分鐘內，堤亞高施華已兩救空門，到5分鐘終於失守，李安度杜沙特接應三笘薰靚傳，近門射成1:0。
白禮頓繼續快速狂攻，車仔後防冇晒節奏，羅夫度斯卓克、杜利奧查洛巴先後擺烏龍，上半場已落後0:3。
下半場3分鐘，夏維斯接應干拿加歷查左路靚傳頂成1:3，但之後未有再構成威脅，反而白禮頓有更多入球機會，補時階段柏斯高哥斯射成4:1完場。
今次係白禮頓史上首次於聯賽擊敗車路士，之前4和10負。經此一役，執教薩斯索羅成名、奉行進取踢法嘅意大利主帥迪沙比，正式成為白禮頓新英雄。
未對白禮頓前，樸達教咗9場，成績為6勝3和，原本有機會成為車路士史上首位頭10場不敗嘅英籍領隊，但都係嗰句：「出得嚟行，預咗要還！」
車路士輸波，令紐卡素領先3分坐穩第4位。紐記主場4:0大炒阿士東維拉，不敗走勢延續至8場。開紀錄嘅係哥林威爾遜，佢入兩球，祖連頓一球，當然唔少得阿米朗，呢位巴拉圭攻擊中場腳風超順，又入世界波。
維拉上場送賓福特4蛋，點知今場即時打回原形。新領隊艾美利11月上任，睇吓呢位歐霸盃專家，可唔可以帶領維拉再創輝煌啦！
紐卡素仍然只係第4，全因熱刺作客奇蹟反勝般尼茅夫、繼續守住第3。熱刺一度落後兩球，但下半場中段開始絕地反擊，先後由賴恩施斯隆、賓戴維斯建功追和，到補時2分鐘，賓坦古亞射成3:2，反勝完場，熱刺保住第3，領先紐卡素2分。
