【英超】爭標雙雄半力出擊照贏波;路維吐烏氣、科頓中三元!完美演繹10號本色

英超轉入最後直路,爭標雙雄阿仙奴、曼城今晨齊齊主場出擊,並收起部份主力,不過實力仍然超班,分別輕取盧頓2:0及擊敗阿士東維拉4:1,目前佢哋多踢利物浦一場,阿仙奴68分第1、曼城67分第3。

阿仙奴大玩輪換,收起迪勤懷斯、薩卡、加比爾捷西斯、佐真奴、加比爾馬天尼利,用柏迪、尼爾遜同路維等擔正,對住盧頓當然夠做,上半場24分鐘,路維仔策動反擊,由奧迪加特接應夏維斯傳送射入;完半場前,又係路維左路傳中,令盧頓中堅橋岡大樹擺烏龍,阿仙奴領先2:0後拖慢節奏,順利以呢個比數完場,全取3分。

賽後路維理所當然成為最佳球員,今場踢咗85分鐘,亦係佢自2022年4月後,上陣聯賽嘅最長時間。把握到僅有嘅正選機會而即有貨交,路維難掩興奮之情:「雖然我同部份隊友上陣機會唔多,不過我哋大家就好似一家人咁,隨時都要做好上陣嘅準備,用表現向領隊證明,我哋係值得上陣。今場入唔到波,不過創造咗兩個入球,我為自己嘅表現而高興。」

至於曼城就收起艾寧夏蘭特同奇雲迪布尼,用基亞利殊、杜古同艾華利斯踢正選,11分鐘,科頓交畀杜古右路傳中,洛迪射入先開紀錄。17分鐘,維拉反擊,杜蘭射成1:1。完半場前,曼城由科頓射入靚罰球,領先維拉2:1返更衣室。

換邊後62分鐘,科頓接應洛迪傳送冷靜射入,曼城擴大優勢至3:1,8分鐘後,科頓左路推大位轟入靚波,完成今季第二次帽子戲法,今季各項賽事已入21球,最終助曼城大勝維拉4:1完場。

曼城上場同阿仙奴賽和0:0,今季對住前5名球隊(阿仙奴、利物浦、熱刺、維拉),6戰只得4和2負,今場終於打破宿命贏維拉,賽後哥迪奧拿當然大讚科頓:「只要科頓踢中路位置,佢嘅入球能力就可以盡情釋放,佢係頂尖嘅世界級球員,不過佢仍需要喺掌握節奏方面下苦功……總之,只要科頓踢10號位,就會有好大威脅。」