周六晚英超爆冷連場，曼市雙雄齊齊倒灶，其中曼聯表現再一次令球迷失望，主場0比1不敵水晶宮，今季聯賽7戰4負得9分，寫下球會近34年最差開局，與第4名的維拉相距達6分之多。
曼聯早前取得兩連勝，新兵前鋒海倫一度令球迷寄望甚殷，不過今仗該丹麥前鋒表現沉寂，食白果之餘，更因他解圍不遠下變相「烏龍助攻」，成為輸波關鍵。
「紅魔鬼」防線仍然天殘地缺，要由安拉拔客串左閘，曼治擔正，與卡斯米路鎮守中場，前面般奴、柏利斯查、拉舒福特支援海倫。水晶宮今仗強陣出戰，攻守核心伊斯、佐基姆安達臣復任正選。
周中聯賽盃，曼聯於主場3比0輕取水晶宮，但來到聯賽，兩軍再鬥的形勢略為不同，曼聯雖取得較高控球比率，但真正具威脅埋門不算太多，12分鐘，海倫接應拉舒福特傳送單刀，已挑過門將森莊士東，可惜泰歷米素爾及時於白界線前解圍。
全場唯一入球，出現於25分鐘，水晶宮伊斯開出罰球，佐基姆安達臣伏兵遠柱，第一時間窩利死角入網，水晶宮爆冷作客領先1比0。
換邊後曼聯攻力仍無起色，般奴費南迪斯勁射被救，安拉拔射門亦曾中楣，其後曼聯領隊坦哈格抽起一對中堅，換入麥佳亞及雲迪碧克，操作令人摸不著頭腦，最終曼聯輸波，主場聯賽錄得兩連敗。
