又爆冷，曼城連輸兩場！繼周中聯賽盃輸畀紐卡素而出局後，曼城再喺周六英超不敵狼隊1:2，聯賽6連勝金身終於斷纜。
周中曼城要喺歐聯鬥RB萊比錫，不過今仗依然精銳盡出，洛迪上場領紅停賽，今仗由高華錫同馬迪奧斯紐尼斯喺中路拍檔，射手榜一哥夏蘭特列陣，由杜古、艾華利斯同菲爾科頓支援，而狼隊則由根夏、黃喜燦同柏度尼圖組成三叉戟。
曼城一如既往控制戰局，但狼隊攻勢唔使多，一吓突擊就搞掂，13分鐘，近排狀態大勇嘅柏度尼圖，個人表演式咁喺右路突破底線傳中，省中魯賓迪亞斯膝頭入網，狼隊先開紀錄。
曼城即時大軍壓境，不過狼隊防線極為緊密，力保優勢至完半場。不過久守必失，58分鐘，曼城憑祖利安艾華利斯罰球妙射上角，追成1:1。
以為吹起反勝號角，點知開心咗11分鐘，就被一盆冷水照頭淋。狼隊轉守為攻打突擊，根夏控定個波傳中，輾轉間由黄喜燦射入，就係呢球波，助狼隊爆大冷險勝曼城2:1，終止對方英超全勝強勢。
曼城王牌前鋒夏蘭特，今場賽前6戰入8球，今仗踢足之下慘食白果，全場得15次掂波、1次射門，盤帶2次、1次成功，成場波同隱形冇乜分別。
