「攻心為上」，熱刺領隊干地出大絕，逼使原本狀態低迷嘅孫興民，嚟一個絕地大反擊！呢招大絕係咩？就係貶佢做後備喇！
熱刺主場迎戰李斯特城，干地繼續排三叉戟攻堅，用李察利臣、古路斯夫斯基拍哈利卡尼，而之前仲未開齋嘅孫仔就被貶後備。
開波6分鐘，李城就憑泰利文斯射入12碼開紀錄，以為終於有機會唔使輸啦，點知開心咗2分鐘，卡尼就藉住角球扳平，之後艾歷迪亞建功反超前、李城麥迪臣轟入靚波，半場已經2:2。
換邊後雙方繼續搏拳，賓坦古亞為熱刺射成3:2，李城開始心急，呢個時候，熱刺主帥干地就換入孫興民，孫仔被貶後備唔單止冇灰機，仲用鬥志將憤怒化成動力，59分鐘落場，由第73到86分鐘期間連入3球，帶領熱刺6:2屠城，成為熱刺史上首位喺英超後備上陣戴帽嘅球員。
賽後干地話：「我同孫興民講，如果佢每次後備踢30分鐘都入3球，我哋要繼續呢個實驗，當然，我講笑啫。」熱刺開季7戰5勝2和，又難怪干地咁風騷。
另邊廂李斯特城開季7戰得1分，仲要失22球，創下英超史上最差嘅防守紀錄，領隊羅渣士亦扯白旗，話尊重球會決定，據消息指李城日內出手，換帥首選係賓福特領隊法蘭克，次選前般尼領隊戴治。
