【英超】熱刺3:1反勝水晶宮 繼續衝前4;孫仔單騎疾走建功 繼續刷新亞洲人紀錄

孫仔亞洲球員天花板!倫敦打吡,熱刺主場以3:1反勝水晶宮,26場50分續排第5,踢少1場落後維拉5分,繼續向前4發起衝擊;水晶宮換帥後首敗,27戰28分排第14位。

官方MOTM當然係隊長孫興慜,呢位南韓球星唔單止多次靚傳,完場前更狂奔單刀鎖定勝局,打破自己喺球會達兩個月嘅入球荒,令現場7萬名球迷熱血沸騰。

數據統計,孫興慜正選踢足全場,5次射門1次射正,入1球,35次觸球,3次關鍵傳球,1次中柱。呢個入波係孫興慜今季英超第13球,追平薩卡,並列射手榜第6,距離第一嘅夏蘭特4球。

同時,孫興慜個人第8季英超,累積攻入116球,繼續刷新亞洲球員喺五大聯賽嘅入波紀錄。總計孫興慜已經代表熱刺踢咗396場比賽,各項比賽入157球、助攻85次,絕對稱得上係熱刺傳奇隊長,難怪佢入波後仰天握拳怒吼慶祝,現場球迷瘋狂歡呼拍掌。

熱刺今場繼續進取主攻,用添姆雲拿正選,取代又受傷嘅李察利臣,同孫興慜、古路錫斯基、占士麥迪臣合組進攻四人組。上半場雙方混戰試探,去到下半場嚟料,孫仔先射中柱,大難不死嘅水晶宮喺59分鐘,由艾斯罰球建功開紀錄。

熱刺落後下再發揮後勁王本色,77分鐘雲拿喺遠柱撞入扳平1:1,3分鐘後,基斯頓羅美路接應麥迪臣傳中,頂入反超前一球,完場前2分鐘,孫仔由中場起步狂奔,水晶宮後衛食晒塵,孫仔單刀建功,熱刺成功以3:1反勝水晶宮。