【英超】熱刺領先下又被追和;普帥發火:我想用手掣控制班球員!

周二英超快車,熱刺雖然先開紀錄,但作客韋斯咸仍被逼和1:1,錯失升上第4位嘅機會,領隊普斯迪高路賽後勁不滿,話想好似打機咁,用手掣直接控制球員喎!

開賽僅5分鐘,賓倫莊臣就接應添姆華拿傳中、門前撞入,熱刺極速領先1:0,以為一切順風順水,點知戰至19分鐘,韋斯咸角球攻勢,葛特蘇馬頂入扳平1:1。之後兩軍膠著,直至完場仍無入球。

原本熱刺只要全取3分,就可以暫時升上第4,可惜最終又跌2分,賽後以30戰57分續排第5,落後阿士東維拉2分,而維拉今晚則會作客曼城。

熱刺今仗有68%控球率,但全場只得4次中目標埋門,隊長孫興愍雖然踢足全場,但表現一般,成為失分致命傷。領隊普斯迪高路賽後話:「我哋喺進攻嗰陣可以做得更好,球員嘅思路唔夠清晰,如果我可以好似打機咁,控制佢哋走位就好啦!」對於賓倫莊遜疑似受傷,普斯迪高路大派定心丸:「我認為佢冇乜大問題,只係喺死球嗰陣撞親吓啫。」

同晚賽事,豪門紐卡素同樣於領先情況下,被愛華頓逼和1:1,領隊艾迪賀維賽後難掩怒火:「又係咁!我認為第二球係相當重要,面對任何球隊,都要想辦法拎第二個入球,而唔係又開始放鬆,好不幸,我哋又做唔到。」

紐卡素今場喺15分鐘就由伊沙克先開紀錄,不過杜美特完場前喺禁區內侵犯艾殊利楊格、被判罰12碼,愛華頓射手卡法路雲中鵠,為拖肥拎番寶貴嘅護級1分。