【英超】海倫連續6場入波 曼聯4連勝升第5位;由眾人笑柄到破英超紀錄 名師指路真係咁堅?

由一個笑話到破英超紀錄,呢個後生仔係要讃!曼聯周日英超作客盧頓,丹麥前鋒海倫開賽7分鐘閃電梅開二度,協助紅魔以2:1勝出,聯賽4連勝,只落後第5嘅熱刺3分。海倫更以21歲14日,打破埋最年輕英超球員連續6輪入波嘅紀錄。

開賽1分鐘,盧頓嚴重失誤,後衛比爾回傳乏力畀海倫截到,單刀扭過出迎門將卡明斯基射入空門,為紅魔閃電開紀錄,海倫以21歲14日,打破前紐卡素中場禾諾克保持嘅21歲272日、英超最年輕球員連續6輪入波紀錄。

6分鐘後,加拿祖禁區頂勁射,伏兵門前嘅海倫用心口將個波改變方向入網,個人梅開二度,為紅魔領先至2:0。

盧頓地頭威力強勁,落後兩球下如夢初醒、瘋狂反撲,14分鐘卡頓摩利士門前破網,追近至1:2。換邊後盧頓繼續狂攻,後防出現唔少空位,不過拉舒福特、加拿祖先後單刀,都被神勇嘅卡明斯基擋出。補時階段,盧頓中場巴克利接應左路角球頭槌頂中楣,曼聯最終贏2:1,英超4連捷。

摩利士追成較接近紀錄,令比賽掀起高潮。

海倫今季由阿特蘭大以高價轉投曼聯,曾長期陷入球荒,同曼聯低落戰績成正比,令佢成為笑柄。但近期無論海倫定曼聯都嚟個大翻身,有說法指同早前名宿尹佩斯重返卡寧頓實習,指導海倫有關,令佢開竅、脫胎換骨。

賽後曼聯領隊坦哈格當然激讚海倫:「佢天生就係一名鬥士!當一位前鋒嚟到新嘅聯賽,需要嘅係支持、保持冷靜,建立信心係非常重要,只要一打開缺口,佢就會不斷入球。」

至於海倫賽後受訪,亦保持謙卑:「我冇懷疑過自己,但之前經常入唔到波,係令我有啲沮喪。我知係時間問題,依家我都努力學習同隊友培養默契,我會盡力而為、一直戰鬥下去。」