【英超】法老王回歸養傷;4球炒般茅 利物浦5連勝!紐尼斯爭氣 今季首位雙10球員

雖然缺少5大主力,幸無阻利物浦達成5連勝,佢哋周一凌晨作客4:0大破般尼茅夫,繼續排榜首,喺多踢一場下領先曼城5分。

賽後,利物浦主帥高普更宣佈,沙拿即將飛返英倫養傷。據高普所述,沙拿並唔係就此告別埃及大軍,而係當沙拿傷癒、埃及又未喺非洲盃出局的話,沙拿就會飛返科特迪瓦繼續參加比賽。

早前埃及足總表示,沙拿最快都要喺8強階段先有望復出,不過埃及目前分組賽告急,莫講話8強咁遠,依家隨時連入16強都有問題。

點都好,沙拿、遠藤航為國家隊出征,阿諾、羅拔臣、蘇保斯拉爾受傷,5位主力俱缺陣,令利物浦兵源極為不足,後備席上更大部分係年輕新人。好在祖高美斯、居迪斯鍾斯、巴特利等非常規主力,今仗都有唔錯表現。

般尼茅夫之前曾爆冷擊敗曼聯,亦有打和維拉紀錄,排第12位已超出外界預期,但面對陣容不整嘅利物浦,並未能製造太大威脅,雖然上半場仍然頂得住,但下半場開波3分鐘即失守。

居迪斯鍾斯、祖達禁區邊美妙而簡單配合,造就達雲紐尼斯禁區內順勢撥入。70分鐘加普助攻,傳祖達勁射破網,呢位葡萄牙前鋒更喺79分鐘梅開二度,射成3:0。92分鐘,祖高美斯右路傳向遠柱,紐尼斯剷射成功,4:0完場。

烏拉圭中鋒職業生涯入球抵達100大關,雖然曾經係被嘲笑對象,但佢真係爭氣,成為今季首位有10入球10助攻嘅英超球員,總算洗脫天價水貨污名。