明明有大球會睇中，可以加入豪門，但呢個後生仔偏偏嫌錢腥，選擇加入英超中型班。點解？因為謝拉特魅力太強！
馬賽22歲新星保巴卡卡馬拉，司職防守中場，由於表現出色，最近仲入選埋法國國家隊，亦成為馬德里體育會、國際米蘭、AC米蘭等勁旅嘅收購目標。
不過保巴卡卡馬拉向呢啲大會say no，寧願放棄參戰歐聯機會，已落實加盟阿士東維拉。呢個決定，令球圈好多人都摸不著頭腦。維拉上季喺英超排第14位咋喎，新一季唔通有得爭前4咩？人工同上述豪門相比，據外媒報導亦少一大截。
原來呢個選擇，全因童年情意結，令保巴卡卡馬拉決定追隨維拉領隊謝拉特。佢話：「謝拉特係我童年偶像，我好細個已經好鍾意睇佢踢波，當時謝拉特絕對係世界最佳中場。我畀佢嘅計劃吸引，偶像向我招手，冇得拒絕。」
謝拉特的確有過人吸引力，即使維拉各方面條件唔雄厚，亦説服到古天奴、保巴卡卡馬拉呢類有卡士嘅球員加盟。跟住仲有邊個？西維爾巴西後衛迪亞高卡路士無限接近，好快會飛去英國做體測。
神奇隊長，同利物浦始終千絲萬縷，蘇亞雷斯、祖高美斯一直被指係謝拉特嘅目標。最新有占士米拿，呢位通天老倌已經同紅軍約滿，暫未傾掂新約條件，亦有機會轉投維拉。
