【英超】沙拿復出1入球1助攻 利物浦大勝賓福特;兩弗馬受傷 高普贏波黑面:情緒好矛盾

法老王回歸,立即顯示威力!沙拿由埃及國家隊重返利物浦陣營,後備上陣貢獻1入球1助攻,帶領紅軍作客4:1大勝賓福特。但高普唔單止唔興奮,仲黑晒面,因為兩位弗爆球員負傷離場,隨時又有排抖。

利物浦今仗有遠藤航回歸復任正選,沙拿亦列後備,連養傷多時嘅左後衞羅拔臣亦可以披甲,但紅軍再次黑氣纏身,估唔到半場又傷兩件。

戰至34分鐘,今季表現突出嘅年輕中場居迪斯鍾斯受傷,未能繼續比賽,由賴恩格雲貝治入替。1分鐘後,迪亞高祖達頭槌二傳,達雲紐尼斯單刀笠射入網,利物浦領先1:0。

沙拿去踢非洲國家盃期間,迪亞高祖達、達雲紐尼斯、路易斯戴亞斯前鋒「三叉㦸」有料到,特別係迪亞高祖達最醒神。呢位葡萄牙國腳出名腳患馬,去到利物浦季季要長抖,踢咗一輪好波又中招,佢喺44分鐘一次搶波中倒地,畀對手責咗落左膝頭,之後企都企唔到,要由擔架抬離場,隨時又唔知抖幾耐。難怪高普場邊黑晒面,非常沮喪。

沙拿後備入替迪亞高祖達,冇比賽一輪依然發揮關鍵作用,55分鐘妙傳中路,阿歷斯麥阿里士打入楔時間啱啱好,射成2:0。

賓福特想反攻,後防更立立亂,沙拿同後備前鋒加普各入一球,主隊由王牌前鋒艾雲東尼破蛋。利物浦贏4:1後,25戰57分繼續居榜首。

賽後高普話:「我依家嘅情緒好複雜,係贏波,但我哋傷咗兩位球員,暫時唔知有幾嚴重……而且達雲紐尼斯亦帶傷而回,我哋未確定佢係咪傷咗,但佢Feel到有啲唔妥。」