身處低谷欲想翻身，首要夠激。利物浦周日重現紅軍魂，球員爭氣踢出代表作，賽前被全面睇淡下，主場以1:0擊敗曼城，送藍月亮今季首場敗仗。
兩隊踫頭，成為近季嘅英超打吡、最高水準較量。但今季利物浦狀態大滑坡，戰績不濟，賽前被全面睇淡，甚至好多人等睇艾寧夏蘭特數爆紅軍防線。
做人要爭氣，踢波亦如是。利物浦今仗雖然冇進攻核心路爾斯戴亞斯，但球員打番出應有水準，上半場同曼城拉成均勢，完全不落下風。
特別係中後防線季初備受抨擊，但面對強大對手，逼搶補位都執番正，緊盯夏蘭特、迪布尼；更要讚占士米拿，36歲老將客串做右閘，防守固然穩陣，間中仲可以落底出波，點到你唔服。
雙方下半場節奏加快，高潮一個接一個。沙拿單刀射唔入；菲爾科頓入波，但夏蘭特犯規在先判詐胡；祖達近門頭槌僅僅高出；加埋艾利臣救出夏蘭特近射，真正拳來腳往。
直至76分鐘，入球終出現。艾利臣接波後，放出招牌式長途龍門球，GPS又搵沙拿，簡些路解圍漏踢，益晒沙拿單騎獨放，單刀射成1:0。
今場利物浦終於回復血性，末段靠拚勁頂住曼城狂攻，如果唔係後備達雲紐尼斯獨食敗家，仲可以憑突擊擴大紀錄。
利物浦憑激情致勝，但當中最激，一定係高普，佢完場前因為沙拿遭侵犯作出強烈抗議，結果畀球證趕出場。但可以喺低潮時贏到哥迪奧拿，攞紅牌又有乜所謂吖。
曼城踢咗10場，今季終於首度輸波，23分排第2，落後阿仙奴4分。兵工廠憑布卡約沙卡入波，1:0險勝列斯聯。
利物浦9戰13分，升上第8位，雖然同榜首有一大段距離，但只要繼續保持今仗水準，仍然有力殺番上前4。
