坦哈格樹立權威，處罰C朗，曼聯周六晩英超聯賽作客車路士，唔畀佢隨隊出賽。破局難收，C朗好有可能以咁唔體面情況，終結第二次紅魔生涯。
周中快車2:0贏熱刺，C朗列為後備，仍未完場，佢就擅自離開後備席，走向球員通道。據知佢冇返入更衣室，而係直接離開球場。
呢個動作，對球會、領隊、隊友以至球迷，都極唔尊重，受罰無可避免。曼聯今晨發出聲明：「周六對車路士，C朗將唔會隨隊出征。其他球員正集中備戰。」
除停賽外，C朗暫時仲只能單獨操練，面臨扣薪兩星期，即約72萬鎊。處罰決定由坦哈格作出，仲得到會方全力支持。
有消息指，坦哈格已經忍夠，決心喺1月轉會窗重開時將C朗賣走，就算到時冇球會接收，寧願賠錢，都要提前半年解約，以免影響球隊士氣。
C朗做出呢個行為，睇到佢已唔理外界評價，決心走人。預計C朗短期內唔會再為曼聯上陣，下次再睇C朗踢波，可能要等到11月世界盃開打。
C朗上仗對紐卡素做正選，被調離場時已不滿，除不斷擰頭，更完全無視坦哈格；對熱剌做後備，令佢更感憤怒，擅自離場前，拒絕以後備身份上陣。
坦哈格今次做法，無疑樹立樹威形象，但亦有人為C朗不值，英國著名足球節目主持皮爾斯摩根，抨擊坦哈格以羞辱C朗為樂，唔止將球王貶為後備，仲要佢經常熱身，跟住冇得出場，對史上最佳射手極唔尊重。
分手，的確係一個最佳結局。
開季前，C朗巳提出離隊，要加盟有得踢歐聯嘅球會，但擾攘多時，始終未能成功轉會；雖然已屆37歲，但C朗對自己仍要求極高，唔接受自己已非必然正選嘅事實，情緒一直醖釀，終於導致今日嘅局面。
既然難以融合，衷心希望C朗一月可以另謀發展，但細心一諗，現階段有冇參戰歐聯大球隊，會容得下C朗呢？定還是C朗會放下執念，去一啲有得踢正選，但冇歐聯資格嘅球隊呢？
數字最客觀，以下統計係坦哈格用唔用C朗嘅數據：
今季C朗英超正選（2場）
曼聯全隊平均跑動距離：98.5km
場均得分：0.5
今季C朗英超後備（8場）
曼聯全隊平均跑動距離：108.5km
場均得分：2.25
