【英超】水晶宮添食!鶴臣留任 勢刷新英超最大年紀主帥紀錄!

薑始終係老嘅辣!水晶宮看守領隊鶴臣爺爺上任後,只需4場即獲3勝1和,極速宣佈護級成功,而且更一改昔日沉悶踢法,好睇又好食,會方遇到Mr. Right,當然把握機會,同爺爺傾續約。

8月就會年屆76歲嘅鶴臣,曾經執教瑞士、國際米蘭、富咸、利物浦及英格蘭國家隊等等,經驗極度豐富,之前亦執教過水晶宮,直至2021年離任,護級絕對有一手。

鶴臣離任後,水晶宮亦改由韋拉接手,雖然踢法較以往悅目,但今季卻捲入降班漩渦,爺爺亦再度臨危受命出山救亡。

賽程編排上,鶴臣出山亦如有神助,頭4仗對手即為李斯特城、列斯聯、修咸頓及愛華頓,4隊都係直接護級對手,結果水晶宮呢4場豪取3勝1和,22日時間,火速護級成功。

鶴臣原定只係教水晶宮10場,但由於成績實在太好,會方打算「添食」,而爺爺基於對球會嘅愛,相信亦唔會托手㬹。消息指雙方洽談已進入最後階段,鶴臣會教多一季,只待細節就可落實,如果成事,鶴臣亦將刷新英超最老主帥紀錄。

事實上,鶴臣上任後,10號核心伊斯脫胎換骨,而且鋒線王牌沙夏同爺爺關係友好,鶴臣繼續執教,對球會傾續約,絕對大有幫助。