【英超】殺神失準 最強兄弟科頓救駕!曼城反勝曼聯3:1 冠軍決戰前夕 只少利物浦1分

記住嚟緊星期日晚11點45分,睇英超冠軍關鍵戰利物浦主場對曼城,兩隊只相差1分咋!

曼城喺周日晚主場對曼聯,好早就失波,兼且上半場出現破紀錄嘅攻門次數,可惜仍然未能追和。好在科頓下半場做救世主,梅開二度協助曼城反勝3:1,目前佢哋同利物浦都踢咗27場,曼城落後1分。

曼聯中鋒海倫繼續養傷,亦明知今仗必處下風,坦哈格索性用般奴費南迪斯做假9,拉舒福特、加拿祖支援,用齊卡斯米路、麥湯米尼、明奈3個防中,希望以穩守突擊制勝。

曼聯上半場雖然只有兩次射門,又真係畀佢搞掂,開波8分鐘,門將奧拿拿大腳開上前場,般奴費南迪斯回傳中路,拉舒福特離門老遠勁射,世界波靚到撞楣底入網,曼聯領先1:0。

福仔世界波先開紀錄。

咁早失波,曼城即開動反勝mode輾壓紅魔,單係上半場已有18次射門,係英超自2003-04球季有正式統計以來,曼城射門次數最多嘅上半場。但除咗過唔到奧拿拿(救出3個危險攻門),最慘仲係自己友敗家。

夏蘭特周中英足盃入5球,但嚟到曼市大戰,竟然做咗敗家仔。科頓一次頭槌二傳中路,夏蘭特離空門只有幾碼,竟然將個波撞高,除咗呢個空門,佢仲有兩次頭槌門,都係頂到離行離列,殺神都咁搞法,曼城上半場唯有落後。

殺神唔掂,好在仲有太子。作為曼城引以為傲嘅青訓產品,科頓今季越趨成熟,喺球隊苦無破關辦法,挺身而出解困局。56分鐘,佢喺右路禁區邊燙射遠柱,角度之精準,又係一個超級世界波。80分鐘,太子同祖利安艾華利斯配合,劏開曼聯防線,科頓完成最後工作,射成2:1。

曼聯曾換人求轉機,但安東尼固然對進攻冇幫助,另一後備安拉拔就更輪盡,91分鐘後場自己控甩腳,益晒夏蘭特射成3:1完場。曼聯英超兩連敗,27戰44分排第6,較第5位熱刺少6分兼多踢1場。