兩星期嘅國際賽期完結，嚟緊又回歸聯賽戰線，周末就有場超級大戰等住大家，阿仙奴主場鬥熱刺。阿仙奴好多球員免役，而熱刺班國腳就忙得多，但有冇發覺，點忙都好，哈利卡尼真係好少傷，可以長期為熱刺同英格蘭國家隊做正選，極少見到佢因傷缺陣，唔通佢有金剛不死之身？
29歲，依然咁踢得，夠晒勤力，除咗自己生活正常、唔煙唔酒，集中精神練波外，當然亦有外力幫助。據卡尼所講，自己保健嘅秘笈，原來係一位西班牙物理治療師。
哈利卡尼唔係天生不死身，喺2019-20球季，佢曾經不停受傷，缺席各項賽事共16場。但之後嗰季開始，情況全面好轉，只喺極少數賽事倦勤。
更勁嘅係自去年4月起遠離傷病，上季除咗喺5場次要賽事休息外，出足其餘50場；今季9場英超同歐聯都踢足，得到6入球1助攻。哈利卡尼透露箇中秘密：「2020年大傷之後，我請咗一位新物理治療師，佢來自西班牙，合作已將近3年。」
合作關係好到爆，又見顯著成效，梗係掂啦，呢位物理治療師，仲可以隨傳隨到㗎！卡尼話：「喺佢幫助之下，我感覺到自己身體起變化，特別係足踝嘅改變。雖然佢唔喺英國住，但我一個月內，總有一星期都需要佢照料，所以每當嗰個星期，佢就會住喺我屋企。」
