聲大大、冇貨賣！尼高拉斯積遜今夏以3,200萬鎊身價，由維拉利爾過檔車路士，呢位塞內加爾前鋒入球產量唔高，但黃牌產量就相當之高，6場聯賽已累積5面黃牌，全部都係衰投訴同不君子行為，嚟緊要自動停賽一場。
積遜上車之後，唔少人都質疑佢有冇足夠能力，孭起車路士頭號中鋒呢個位置，而事實證明，呢位22歲嘅射手，似乎暫時仍未能擔起進攻大旗，開季6場聯賽場場正選，頻頻失機、只入1球。
不過，佢喺拎牌方面就特別有心得，上仗對維拉因為阻住門將馬天尼斯開波嘅不君子行為，被球證罰黃牌，連同之前嘅比賽，6場波已累積5面黃牌，仲要之前嗰4牌黃牌，全部都係因為鬧球證而「申請」成功。
事實上，英超今季已講明嚴格限制球員對球證不敬嘅行為，22歲嘅尼高拉斯積遜後生仔即係後生仔，瀨過咁多次嘢仲唔醒水，依家終於要付出代價，嚟緊聯賽對富咸要停賽一場。
普捷天奴其實早就告誡過佢，喺對維拉賽前，已公開叫積遜留意一下自己嘅行為：「因為同球證嘈交而拎4張黃牌，真係好無謂，要拎黃牌，都要拎得有價值一啲，如果再唔改善，佢嘅行為會累到隊波。不過，積遜仲係好後生，佢只要繼續學習，就會成為一位出色嘅球員。」
積遜今次冇再同球證嘈，但就阻住對手開波而領黃停賽，叻仔嚟。依家佢喺英超黃牌榜單騎領放，紐卡素翼鋒哥頓有4面黃牌，緊隨其後。
