【英超】梅開二度 助利物浦大勝晉級 4強鬥富咸;鍾斯仔:咩比賽冇所謂,我只想為紅軍踢波!

利物浦喺英格蘭聯賽盃以5:1輕取韋斯咸,梅開二度嘅居迪斯鍾斯成為關鍵功臣,賽後受訪嗰陣更表明無論出戰咩比賽,都會全力以赴,因為佢只係想好好踢波爭正選!

利物浦周末要對阿仙奴,今場先收起沙拿、阿諾特,不過28分鐘仍由蘇保斯拿爾禁區外建功,利物浦半場領先1:0。換邊後,居迪斯鍾斯超窄角度射入,鎖定2:0勝局,其後此子再入一球,加上加保、沙拿建功,炒韋斯咸5:1晉級,4強將會主場鬥富咸,而另邊廂車仔則作客英冠球隊米杜士堡。

居迪斯鍾斯今場表現出色,但佢喺紅軍一直只係副選,賽後呢位中場大將受訪,仍表達出樂觀積極態度:「聯賽盃又好、歐聯或者英超都好,我只係想踢波咋!」

鍾斯繼續補充:「只要我有機會落場,就會保持住微笑,拚命去幫球隊,哈哈,今日我入咗兩球,我當然會繼續有笑容啦!」

喺電視台做緊直播嘅名帥哈利列納,就話鍾斯喺其他球隊的話,一早就係必然正選:「佢嘅能力,去到英超任何一隊都會係核心正選,佢愛利物浦,所以留低。我認為佢擔正只係時間問題,希望高普諗清楚啦!嚟緊英超大戰阿仙奴,佢會唔會有正選?」

至於喺賽後訪問企喺鍾斯隔離嘅加保,亦大讚呢位手足:「聖誕老人提到嚟到喇!老友,你一直都好搏命,喺訓練嗰陣,我哋所有隊友都睇到,我為你驕傲!繼續加油!」