【英超】李察利臣爭氣 復出兩仗都有士哥!熱刺兩蛋贈森林 2連勝信心返晒嚟

李察利臣成為熱刺及時雨!呢位巴面前鋒近期表現爭氣,連續兩場有士哥,協助熱刺於周六凌晨英超作客以2:0擊敗諾定咸森林,取得2連勝,信心返晒嚟。

上場對紐卡素贏得精彩,熱刺今場繼續由李察利臣掛帥,孫興民踢番左翼位置,同古路錫斯基、倒戈嘅賓倫莊遜合作;森林則有艾蘭加、傑斯韋特合作攻堅。

頭10分鐘,主場出擊嘅森林係威係勢,但熱刺企穩陣腳後攞番控制權,賓倫莊遜亦頗有威脅,可惜踢咗32分鐘就傷出。森林喺中場搶贏唔少控球權,但組織唔到,結果熱刺上半場補時2分鐘把握機會,古路錫斯基傳中,李察利臣一錘定音,半場熱刺領先1:0。

60分鐘,森林王牌艾蘭加突圍射入,但被判越位在先,熱刺大難不死,5分鐘後即憑古路錫斯基射成2:0,鎖定勝局。熱刺及後有比蘇馬領紅,但仍保持贏2:0到尾,17戰33分續排第5位。

熱刺喺李察利臣、占士麥迪臣兩大攻擊球星養傷下,曾經歷5場不勝,但巴西前鋒復出後2仗入3球,同時亦䆁放孫興民,令佢唔駛孤軍作戰。領隊普斯迪哥高奧讚李察利臣係「怪物」:「佢係禁區內嘅怪物,我哋每次訓練感覺都好好,我哋有信心佢會幫我哋完成任務。」