正當熱刺隊友於更衣室內、瘋狂慶祝2:0擊敗愛華頓之際，有一個人，卻於旁邊獨自痛哭。李察利臣深知自己傷勢不妙，極有可能錯過11月世界盃決賽周。
倒戈對愛華頓一戰，李察利臣上半場表現活躍，多次帶來威脅，但下半場剛開始，小腿已經不適，隨即被換走。離場時，李察利臣一拐一拐，神情落寞，直接走入更衣室。
再從更衣室走出時，已用上雙拐仗，睇嚟傷情的確唔輕。効力愛華頓時期，李察利臣曾出現小腿肌肉撕裂，休戰整整兩個月。依家最擔心係出現同樣傷情，令佢失去代表巴西參戰世界盃嘅機會。
接受巴西ESPN採訪時，李察利臣忍唔住流淚，「本來我馬上可以實現參加世界盃嘅夢想，可惜，依家只能希望以最快速度康復。」
唔止參戰世盃，以李察利臣近期國際賽嘅驕人表現，更被廣泛預計會做巴西國家隊正選，同尼馬拍住上，只可惜，依家一切都可能幻滅。
英超比賽強度高，近期不斷有球員受重創影響世盃夢。車路士右閘列斯占士，周中歐聯對AC米蘭時亦受傷，幾可肯定無緣參戰決賽周。而體能王尼高路簡迪，亦同樣因傷將缺席世界盃。
熱刺憑第400次上陣嘅哈利卡尼，下半場入12碼先開紀錄，加上賀積查治建功，主場挫愛華頓，10戰23分穩守第3位。榜首阿仙奴9戰24分，曼城9戰23分。
干地確係有料，今場勝仗，令熱刺刷新球會英超前10輪積分紀錄，之前紀錄係2011-12年球季22分。上次頂級聯賽前10輪超過23分，已經要追溯到1963-64賽季。而計聯賽及盃賽，熱刺主場已10連勝，當中入27球，失7球，有5場保不失。
