【英超】有祖達係贏得輕鬆啲!利物浦3:1挫富咸 周中快車作客愛華頓,有冇暗湧?

利物浦終於輕鬆贏番場,周日英超作客3:1挫富咸,終止近期頹勢,繼續保持爭標三頭馬車之爭。

經過本周賽事,阿仙奴、利物浦都係33戰74分,各自仲有5場。曼城打少場73分。嚟緊周中開快車,阿仙奴周三凌晨主場對車路士、利物浦周四凌晨作客愛華頓、曼城周五凌晨作客白禮頓。

利物浦近期除歐霸盃出局,聯賽亦先後賽和曼聯及不敵水晶宮,原本嘅領先優勢已被曼城取代。連右後衞阿歷山大阿諾特對富咸賽前受訪時都話,擔心紅軍自爆,又會重蹈覆轍,令穩定性最強嘅曼城再登皇座。

雖然賽前係咁講,但近期傷愈復出嘅阿諾特,上半場依然好活躍,32分鐘更以一個靚絕自由球,為利物浦先開紀錄。富咸主場對強隊,時有佳作,卡斯泰利上半場補時2分鐘扳平,一度令紅軍迷擔心又再分。

但中場頼恩格雲貝治,53分鐘禁區邊勁射得手,令利物浦再度領先。今場沙拿被收起,由迪亞高祖達、加普、路易斯迪亞斯做3前鋒,組織攻勢比起用沙拿、達雲紐尼斯,似乎更直接爽朗。

迪亞高祖達72分鐘又發揮效率,接應加普傳送,半單刀射成3:1,鎖定勝局。阿諾特同迪亞高祖達,早前都養傷一段時間,季尾及時復出,今仗都有搶眼表現,無疑能增加利物浦爭冠階段籌碼。