周一凌晨英超，曼聯作客2:1擊敗愛華頓，C朗後備建功，為曼聯奠定勝局，係佢近兩個月除歐霸盃一個12碼外嘅入球。悶局打破，會唔會回復正軌，入波陸續有嚟？
馬迪爾近期腳風順，連續兩場後備入替有波入，今仗終於做曼聯正選前鋒，佢出得，C朗自然繼續做後備。
愛華頓已6場不敗，今仗主場出擊，開波5分鐘亦藉卡斯米路中場被迫甩波，最後由伊禾比射入世界波，先開紀錄。曼聯反攻，亦藉愛華頓中場傳失波，一個簡單直線反擊，由安東尼單刀射入扳平。
馬迪爾真係冇運，今季難得首任正選，亦即有一個助攻，可惜29分鐘又因受傷，唔能夠繼續比賽，C朗得到出場機會。
今季C朗一直愁眉苦臉，經常仰天長嘆，乜入波運都走晒喇！今日佢準備出場時，場邊露出好耐冇見嘅燦爛笑容，咁咪好囉，跟住真係有波入。
44分鐘，愛華頓又有失誤，伊禾比中場控波甩晒腳，卡斯米路送出直傳，C朗快速推入禁區，半單刀射門破網，今季英超，去到第8場終於開齋。
呢個入球，對C朗意義重大，係佢球會級賽事第700個士哥，足球史上第一人達標，美斯以691球緊隨其後。此外，C朗職業生涯總進球數也提升到817球（球會700球，國家隊117球），同樣排歷史第一。
下半場雙方互有攻守，拉舒福特有個突破靚波，可惜因疑似手球在先被判詐胡，最終曼聯贏2:1，8戰15分升上第5位，落後榜首阿仙奴9分，但少踢1場。紅魔下場英超周日主場對紐卡素，跟住周中快車對熱刺，接住周日作客車路士，迎來地獄賽程，睇吓C朗可唔可以藉呢幾場硬仗，世界盃前回復最高水準。
