周二凌晨英超倫敦打吡賽前，熱刺領隊普斯迪高古，大讚基斯甸羅美路係球隊戰績冒升其中一個最重要棋子，但正因呢位阿根廷守將領紅，令熱刺由全取3分的大好形勢而急轉直下，最終主場1:4負車路士！
熱刺輸波，今季不敗金身被打破之餘，更有核心麥迪臣、雲迪尹傷出，加上羅美路、烏迪治領紅，下場對狼隊，以至之後鬥維拉、曼城，熱刺均只能以殘缺防線出戰，原本的聯賽優勢隨時蕩然無存。
今場波上半場戰情相當可觀，特別係前半段，熱刺恃強勢兼主場出擊，開波即全軍逼上，壓住車路士圍揼，6分鐘即由古路施夫斯基射成1:0。咁早開紀錄，熱剌亦冇減慢節奏，繼續谷上搶攻，速度之快令車仔防線一度慌失失，孫興民曾近門撞入，但因為極度微細的越位，慘食詐胡。
防線谷太上，熱刺亦要付上代價，而且非常巨大，車仔避過輸多球大難，開始組織反攻，快速突擊甚有威脅，先係史達寧21分食詐胡，到28分鐘更出現全場轉捩點。
一次連環攻門，摩西斯卡些度禁區外射入，雖然因隊友越位食詐胡，但VAR指射門之前，熱剌中堅羅美路粗野攔截，鞋底踩向阿根廷同胞安素費南迪斯，除被罰12碼外，更直食紅牌出場。高爾彭馬主射得手，車路士追和1:1。
羅美路一向有辣味，今仗更火上加油，之前一次冇波在腳情況下，蓄意踢對手，冇被算賬已經有運，最終獵犬終須山上喪，釀成大錯。熱刺除打少個外，完半場仲有占士麥迪臣同中堅雲迪尹傷出，形勢雪上加霜，甚至對爭標更構成致命打擊。
55分鐘，輪到熱刺左後衞烏杜治惡意攔截，兩黃一紅被逐，熱刺打少兩個下無刻意縮後死守，如非門將古里莫維卡里奧力挽狂瀾，以及賀積查治救出空門，一早已經輸波。
9人應戰冇得搞，去到75分鐘，尼高拉斯積遜終於射破熱刺大門，不過熱刺機會亦唔少，中堅艾歷迪亞曾經頂個波入網，但因越位而食詐胡，最終積遜完場前再入兩球，車路士作客贏4:1，領隊普捷天奴重返熱刺，取得出人意表大勝，11戰15分升上第10位。
熱刺不敗身被破，今季英超再無不敗球隊，11戰26分排第2，比榜首曼城少1分。賽後熱刺領隊普斯迪高路被問到VAR問題，普帥話：「VAR對球證每一個決定都研究一番，呢個就係現今足球嘅方式，老實講，我好唔鍾意。」那為何踢少兩人仍要求球員高位逼搶？「呢個係球隊風格，只要我一日在任，熱刺嘅風格就唔會變，就算得番5個人，我哋一樣咁踢。」
