英超踢到第5輪，每輪都勁多爆點！周中快車重頭戲，利物浦98分鐘入波，主場2:1反勝紐卡素；艾寧夏蘭特已經冇人頂得住佢，帶領曼城6:0大炒森林；阿仙奴2:1贏維拉，保持5連勝，歷史數據預示，阿仙奴今季非冠即亞？
紐卡素雖敗猶榮，雖然有進攻靈魂、「扭波王」辛特麥斯明因傷缺陣，仍踢出優良穩守突擊戰術，並由新加盟貴價中鋒阿歷山大伊沙克於上半場先開紀錄。
利物浦61分鐘由法明奴扳平，之後攻勢未見大威脅，以為又會失分，但補時長達8分鐘，最後一個角球攻勢，做成門前混戰，後備嘅法比奧卡華路近門得手，表現平平嘅利物浦，就咁攞晒3分。
繼對水晶宮後，夏蘭特再戴帽，開季5仗入9球，野獸模式全面啟動；呢5場波，佢只觸球101次，入球轉化率實在高得驚人。夏蘭特今仗有兩個入球，都係由太子菲爾科頓助攻，另一前鋒祖利安艾華利斯亦入兩球，呢位「新阿古路」每次上陣都有表現，未來值得期待。
曼城攻力進一步增強，展示奪標大熱實力時，阿仙奴一班後生仔前鋒亦上晒力，特別係加比爾馬天尼利，喺左路勁Sharp醒，佢同加比爾捷西斯兩個巴西仔各入1球，令阿仙奴喺英格蘭頂級聯賽，第4次取得開季5連勝。
之前4次靚仔開局，阿仙奴當季聯賽最後成績，有兩次成為冠軍、1次亞軍，今季可以再坐亞望冠？搞掂6連勝先講，周日作客曼聯，係今季首個強大考驗。
目前榜首形勢，阿仙奴15分，曼城13分，孫興民連續5輪冇波入，熱刺畀主隊韋斯咸迫和1:1，11分排第3位。
