今季英超競爭空前激烈，尤其前4位置。世界盃後仍未重拾狀態嘅熱刺，尋晚以4:0大炒水晶宮，目前排第5，落後第4嘅曼聯2分。
更可喜可賀嘅，係孫興民終破入球荒，連同哈利卡尼起孖，二人亦正式超越文尼+沙拿，成為英超最強前鋒組合。
熱刺今仗表現慢熱，上半場水晶宮甚至係更有威脅，換邊後熱刺大爆發，48分鐘，卡尼接應比列錫傳中頂入，5分鐘後再下一城，熱刺愈踢愈順，馬特杜靴迪建功、孫興民埋齋，順利喺倫敦打吡以4比0大捷。
卡尼今仗梅開二度，今季已有15球斬獲，其實已相當誇張，只係夏蘭特太恐怖，目前已入21球，卡尼先排喺射手榜第二位。
至於上季英超金靴之一嘅南韓前鋒孫興民，亦憑今仗打破聯賽8場入球荒，謙虛嘅孫仔，賽後更為今季低迷向隊友道歉：「入波個feel真係好正……但我覺得對唔住隊友，佢哋預期我會有更多貢獻……希望呢個入波係轉捩點，令我增強信心、爭取更多入球。」
Opta數據統計，今場係孫仔同卡尼第34次同場英超入波，超越咗利物浦嘅沙拿同文尼，成為英超史上「最強入波組合」。
