周日英超有大戰，曼市打吡夜晚9點開波。曼聯知恥近乎勇，打出4連勝強勁走勢，作客都唔驚曼城。特別係艾歷臣已全面融入，中場發揮強勁威力，同般奴費南迪斯出奇地夾，打破兩人位置重疊嘅憂慮。
艾歷臣近期越踢越好，雖然30歲，上年歐國盃更因心臟病發，幾乎戰死球場，但鬥士無畏，艾歷臣不但繼續戰鬥，更逐漸回復熱刺時最高水準。
早幾日歐國聯，艾歷臣帶領丹麥以2:0擊敗法國，全場觸球80次，3次成功過人，7次對抗4次成功，16腳長傳9次成功，賽後sofascore將佢評為8.3全場最高分，有球評家更讚揚呢場係艾歷臣嘅個人表演。
今季由賓福特免費轉會曼聯，初時好多人質疑點解要搵一個已經30歲，兼且身體狀況有問題球員。依家？唔少人認為，艾歷臣將會係費格遜退休後，曼聯嘅最佳收購。
季前另一憂慮，係艾歷臣同般奴嘅合作問題，因為兩人類型相近，以為會分A、B更，但佢哋竟然成為好拍檔，般奴更表示，因為有艾歷臣，自己進攻走位嗰陣更加自由：「艾歷臣加入曼聯，令我踢得更加自由自在，因為不論我去邊個位置，佢都可以將個波準確咁傳畀我，同艾歷臣合作，係一件賞心樂事。」
