利物浦一代名將加歷查，不嬲口水多過浪花，同加利佬喺《天空體育》唱雙簧兼互窒，經常性派花生畀球迷，的確為節目生色不少。
當然，講得多自然錯得多，加歷查喺今季英超開季前，曾經質疑當時加盟曼聯冇耐嘅利辛度馬天尼斯，認為呢位阿根廷國腳嘅身高，根本不足以應付英超。
球季即將完結，利辛度唔單止應付到英超，表現更極度出色，先成為阿根廷捧世界盃嘅功臣之一，亦助曼聯打破錦標荒，喺防線一夫當關之餘，佢嘅熱血同感染力，更成為紅魔嘅領袖之一。
日前加歷查做賽季總結節目嗰陣，讚利辛度係今季最大驚喜，並主動提番呢件事：「其實唔單止係利辛度，任何身高唔過1米82嘅中堅，嚟到英超都會遇到問題。不過，利辛度卻完全冇問題。」
「利辛度嘅攔截同帶波、傳波都好好，當你提到曼聯嘅核心，你好自然就會諗起佢同卡斯米路，佢哋為曼聯帶嚟好大變化。利辛度係一位勇士、領袖。」
「我鄭重向利辛度、以及所有曼聯球迷道歉，你哋喺twitter出po嗰陣，唔好再@我笑我喇。」原來最尾嗰句先係重點。
