【英超】曾公開寸防線炸彈 1年後阿東高道歉;麥佳亞以德報怨 請埋佢去奧脫福睇波

以德服人!麥佳亞今季用表現說話,令上季對佢冷嘲熱諷嘅球迷、球評家收聲同主動道歉,就連加納國會議員阿東高(Issac Adongo),亦係排隊道歉嘅一份子。

上年底,Issac喺加納財政預算案討論期間,批評加納副總統Mahamudu Bawumia,就好似加納經濟嘅麥佳亞:「喺英格蘭,有一位叫做麥佳亞嘅曼聯球員,佢見人就鏟、奮不顧身,但佢係曼聯防線嘅最大威脅,鏟隊友、為對手助攻。議長先生,如果對手入唔到波,麥佳亞仲會幫埋佢哋去入波。」

當時雖然哄堂大笑,但喺球壇就引起唔少批評聲音,麥佳亞媽媽、英格蘭領隊修夫基,都有公開譴責Issac Adongo。

時移世易,經過艱苦嘅一年,麥佳亞不但冇被打沉,反而越戰越勇、大打爭氣波,不但揮低華拉尼搶番正選位,佢喺歐聯對哥本哈根更一錘定音,令曼聯保持晉級希望,入球數超越鋒線隊友安東尼,與拉舒福特、加拿祖睇齊。

嚟到2024年財政預算討論會,Issac Adongo亦公開向麥佳亞道歉:「你哋仲記得舊年我拎麥佳亞同Mahamudu Bawumia比較嗎?係,議長先生,我依家向麥佳亞道歉。麥佳亞已經走出困境,佢目前為曼聯入波,係關鍵球員。」

Issac Adongo亦引麥佳亞嘅例子嚟補充:「曼聯麥佳亞逆境自強,但我哋嘅麥佳亞,佢目前高高在上兼不切實際!」

麥佳亞本尊知道Issac道歉後,佢亦喺IG公開接受道歉,並邀請對方去奧脫福觀戰:「我已接受Issac Adongo議員嘅道歉,應該好快就會喺奧脫福見到你。」