英超球證連續兩個禮拜做大戰主角，先係上周熱刺對利物浦，今周又有阿仙奴對曼城嘅高華錫爭議，但英國傳媒報導，兩件事背後原來涉嫌牽涉到一個利益集團！
周日晚阿仙奴以1:0力挫曼城，但其實呢場波，唔少球迷都認為球證奧利華（Michael Oliver）偏袒曼城，尤其係曼城中場高華錫連環出「收山腳」，分別侵犯奧迪加特及迪勤懷斯，但竟然只係得一面黃牌，前名哨卡頓保更直言：「出兩張紅牌都唔過份！」好彩阿仙奴最終都贏波，如果唔係肯定引爆軒然大波。
今晨就有英國傳媒爆料，指奧利華喺9月底，曾經獲邀去阿聯酋聯賽執法FC沙迦對艾阿恩，而阿聯酋足球金主就係曼城老闆文梳亞（Mansour bin Zayed bin Sultan Al Nahyan）！
至於曼城主席阿姆巴拉克（Khaldoon Al Mubarak）旗下公司ADNOC，則係阿聯酋聯賽主要贊助商。而阿聯酋足總，最近更直接同曼城傾合作計劃，簡單講，奧利華踩過界客串執法，同曼城關係千絲萬縷。
更加巧合嘅係，熱刺對利物浦一戰，紅軍路爾斯戴亞斯入波被河蟹，嗰場嘅主角VAR球證英格倫（Darren England）同助理曲克（Dan Cook），咁啱又有份喺上文提到嘅同一場阿聯酋聯賽，負責客串做旁證同VAR球證，難免令外界有無限聯想。
報導指，奧利華佢哋出國秘撈執法，係得到PGMOL（球證協會）主席韋比嘅同意，不過咁，當牽涉到英超球會資金嗰陣，係咪應該避忌吓呢？
