麥佳亞成為眾矢之的，無論是否曼迷都對佢窮追猛打。究竟佢真係咁渣，還是代罪羔羊？喺佢呢個最黑暗時刻，竟然有球會伸出援手：車路士有意收購！曼聯迷，係咪大喜訊呢？
曼聯表現差，防線係其中一個極大弱點，身為隊長兼中堅，麥佳亞成為首席罪人，佢一直被全面攻擊，更被認為必需搣柴以息民怨。周二凌晨對利物浦，領隊坦哈格好大機會聽從群眾意見，用華拉尼、辛度馬天尼斯做正選中堅。
麥佳亞係咪真係咁渣？佢喺李斯特城同英格蘭國家隊，表現其實幾好，否則曼聯亦唔會天價收購，當然8000萬鎊轉會費係離晒大譜，呢個身價，亦係害死佢嘅原因之一。
坦白講，麥佳亞喺曼聯嘅處境，可以話前途似咁，好難再得到信任，轉會係好選擇。英國傳媒報道，由於車路士需要中堅儲備，以應付三中堅陣式，所以有意買麥龜，仲願意加入佩列錫作為交易條件。同時間車路士亦斟緊李斯特城法國後衛科芬拿，希望買到其中一個。
除咗車路士可能展開救援，曼聯一代傳奇中堅史譚亦雪中送炭，為麥龜抱不平，認為唔應該將輸波責任推晒喺佢一人身上。
「曼聯防中唔夠力，令到對手更容易向麥佳亞施壓，情況的確好困難。佢防守上無疑有犯錯，但身邊隊友亦責無旁貸，其他後衞應該應變同補位，但佢哋冇做到。」除防守外，史譚亦批評中場同兩閘，從後場組織攻勢時，欠缺無球跑動意識，令企最後一個位嘅麥佳亞，根本交唔出波，處境更困難。
曼聯急買卡斯米路，正係如史譚所講，係搵個好防中，解決核心問題，不過對麥佳亞嚟講，可能已無福消受。與其被踩成地底泥，如果車仔真係收購，唔駛諗快趣走人仲好，車仔本身防守力夠強，咁多保鏢旁身，唔駛做麥麥送喇！
