【英超】曼聯4:3絕殺狼隊!小將明奈做英雄:覺得自己發緊夢!

好睇過戲!周四英超快車,曼聯同狼隊合演入球大戰,狼隊喺補時95分鐘追成3:3,點知紅魔小將明奈(Kobbie Mainoo)整個靚絕殺,奠定4:3勝局,取得個人首個英超入球之餘,仲幫曼聯升上聯賽榜第7位。

明奈話:「夢想成真!我心情仲未平復,覺得自己喺度發緊夢!為自己由細到大都支持嘅球會踢正選,感覺真係好正。尤其可以同隊長般奴費蘭迪斯並肩作戰,佢係一個好好嘅學習對象,總之,成件事都好瘋狂!」

明奈成曼聯贏波英雄。

明奈喺上季開始為曼聯一隊出戰英超,今季則8次登場,每場都係正選,一共比賽咗630分鐘。般奴話:「我睇過明奈喺U18嘅表現,當時我已經同佢講,要有提升上一隊嘅準備。」

今場曼聯以夜蒲詐病缺操嘅拉舒福特、加拿祖同般奴支援正箭頭海倫,明奈、卡斯米路扼守中路。開賽僅5分鐘,福仔即接應海倫回後妙射建功;22分鐘,梳爾傳中,海倫撞入成2:0,近5場射入4球。完半場前,海倫同卡斯美路連環食「詐糊」,造就呢場經典大戰出現。

換邊後狼隊反撲,68分鐘,柏度尼圖博到12碼,沙拉比亞操刀追成1:2,4分鐘後,後備上陣嘅麥湯文尼角球頭槌建功,再度領先兩球。以為可殺死比賽,點知狼隊冇放棄,85分鐘藉角球撞入追近2:3,去到補時95分鐘,柏度尼圖更追成3:3。

以為曼聯又和一場,兩分鐘後,明奈就大演身價,擺脫狼隊守將圍困,搵到私家路殺入禁區妙射,成功絕殺狼隊、全取3分。曼聯賽後積35分,壓過紐卡素及白禮頓升上第7位。