又係福仔！「玫瑰打吡」第二回，曼聯喺4日前主場幾經辛苦先逼和列斯聯2:2，估唔到今次作客，曼聯反而贏2:0。不過過程同樣驚險，列斯聯埋門次數更多，但曼聯後面有迪基亞屢救險球，前面就有腳風順到爆嘅拉舒福特，最終順利全取3分，鞏固前4位置。
曼聯嚟緊周中會喺歐霸附加賽鬥巴塞，今仗收起一對正選中堅華拉尼同利辛度馬天尼斯，麥佳亞獲得解凍，同梳爾鎮守中路，令唔少球迷眼都凸埋。
麥隊今仗亦有唔少交失波嘅情況出現，其中最驚險嘅一球，係麥隊想回傳，點知畀夏里遜逼甩咗個波，幾乎形成單刀，好彩麥隊回身再追、及時解圍補鑊。列斯聯今仗唔係冇攻勢，但森馬維里、干洛圖等鋒將射門，唔係炒高，就係被神勇嘅迪基亞救出。
換邊後，列斯聯仍然係較主動嘅一方，森馬維里冷箭畀迪基亞撲出，之後佢右路狂抽，同樣過唔到迪基亞。雖然曼聯捱打，但前鋒質素嘅分野，就成為今仗勝負關鍵。
80分鐘，腳風超順嘅拉舒福特，接應勞基梳爾妙傳頂入，近9仗聯賽狂入8球；5分鐘後，後備入替嘅加拿祖整多粒，福仔、韋格賀斯之後食詐胡都冇相干，最終曼聯贏2:0。
今場係迪基亞第400場英超賽事，亦係曼聯第一位達到呢個里程碑嘅門將，雖然今仗官方MAN OF THE MATCH係福仔，但迪基亞嘅功勞其實不惶多讓。
目前曼聯23戰46分，落後榜首阿仙奴5分、踢多兩場；同時領先第5位嘅熱刺7分。至於列斯聯炒咗領隊馬殊後仍未有起色，22戰19分排尾4，比第18位嘅愛華頓多1分，但踢多1場。
