'

【英超】曼聯險勝韋斯咸!迪基亞神救 福仔建功 近13年首個100球先生!

今晨英超壓軸戲碼,曼聯主場對韋斯咸,兩代紅魔主帥莫耶斯同坦哈格正面交鋒。由於華拉尼受傷,賽前已知麥佳亞今場會復任正選,令唔少曼迷擔心,不過麥隊今場表現不俗,加上迪基亞力挽狂瀾、拉舒福特一錘定音,最終曼聯以1:0險勝韋斯咸,守住第5位,一眾曼迷飲得杯落。

話題人物C朗今場繼續踢正選,佢同坦哈格對話後獲全面解凍,令佢1月轉會走人嘅傳聞稍為降溫。C朗身後有般奴費南迪斯,艾蘭加、拉舒福特兩翼支援。

面對韋斯咸一對效率中場:迪勤懷斯同蘇錫克,曼聯嘅基斯甸艾歷臣、卡斯米路喺上半場絕無輸蝕,埋門次數更多,去到38分鐘,艾歷臣一個靚傳中,拉舒福特飛頂破網,曼聯領先一球返更衣室。

下半場韋斯咸瘋狂反撲,輪到迪基亞Show Time,先後救出米查利安東尼奧嘅勁射、葛特蘇馬頭槌,期間曼聯有機會將比分拋開,可惜費特迎頂中柱,完場前韋斯咸背水一戰,不過麥佳亞閂走近射、迪基亞救出迪勤懷斯炮彈遠射,幫曼聯保住1:0勝局。

精彩撲救精華

福仔一錘定音,拎到佢喺曼聯嘅第100個入球,成為曼聯史上第22個「百球先生」,而對上一個已經要數到2009年嘅朗尼。

拉舒福特2015年喺曼聯出道,用咗7年時間達到里程碑,福仔賽後喺IG出po:「我終於為呢間特別嘅球會攻入100球!我7歲開始為曼聯效力,踢勻晒所有梯隊、去過晒每一個球場,好感激所有職員、家人同隊友嘅幫助,令我取得呢個成就。」

至於緣盡世界盃嘅迪基亞,收拾失落心情、今場表現神勇,賽後獲選為MOTM,絕對係實至名歸。曼聯領隊坦哈格,亦唔放過讚愛將、串吓西班牙主帥安歷基嘅機會:「一個龍門最重要嘅任務,係保護大門、力保不失,喺呢個範疇嚟講,迪基亞係冇得輸!」

至於尋晚早場,阿仙奴清風送爽,以5:0大炒諾定咸森林,以12戰31分重返榜首位置。美中不足係薩卡受傷離場,暫時未知對出戰世界盃有冇影響。

尼爾遜兩射一傳,成為阿仙奴後備奇兵。