世紀慘案，曼聯作客晏菲路狂吞利物浦7蛋，轟動世界球壇，領隊坦哈格賽後炮轟球員「業餘」、「不可接受」。般奴費南迪斯完全欠缺隊長質素，更受到兩位前隊長大肆抨擊。
0:7，打破雙紅會最大比分歷史紀錄。曼聯創建於1878年，前身牛頓希思，1895年10月，牛頓希思作客晏菲路慘負1:7。1902年，牛頓希思改名曼聯。曼聯對上一次輸0:7，係1931年12月對狼隊，距今都有91年。
7日之前，曼聯登上英聯盃王座，加上4連勝、11場不敗嘅凌厲走勢，坦哈格被吹捧上天，重建曼聯王朝真命天子。但7日之後，呢位荷蘭籍領隊卻被載入史冊……
坦克賽後表示：「完全係業餘表現，上半場我哋表現唔錯，但一個組織錯誤就失波。下半場有太多失誤，輸到3球理應更加團結，但球員表現業餘，完全冇做到，令我好震驚。呢隊唔係我認識嘅曼聯，非常之差。」
順境一條龍、逆境一條蟲，曼聯球員心理質素的確有問題，坦哈格今仗排陣亦有爭議，用億元「圈地王」安東尼踢翼鋒，完全適應唔到雙紅會高強度踢法，頻頻失拖之餘，亦令左閘羅拔臣有大量助攻空間，失第一球正正係由羅拔臣作出美妙傳送，由加普射入。另一邊亦被阿歷山大阿諾特打起信心，加上防線被打散，釀成慘案。
作為隊長，當隊友信心盡失時，理應挺身而出，鎮住場面。但般奴完全冇做到，當連環失波後，反而不斷發脾氣、怨隊友兼唔追波，甚至曾推撞第4球證，冇食紅牌已經夠運。
更離譜係85分鐘，當拉舒福特被調離場時，般奴竟然揮手向坦哈格抗議，點解唔係換走佢。兩位前隊長堅尼、加利尼維爾現場講波，都即時作出抨擊。加利仔指般奴冇品，令人尷尬；堅尼話返到更衣室，坦哈格必需就此事譴責般奴，冇負起隊長責任。
