世界盃前最後一場英超，曼聯作客2:1挫富咸。紅魔大部分時間未能佔有優勢，全靠阿根廷小將加拿祖後備入場，補時3分鐘奠定勝局。
18歲嘅加拿祖，出身自馬德里體育會青訓系統，曼聯2020年買佢只係用咗42萬鎊。加拿祖周中英聯盃對維拉貢獻2個助攻，極受好評，速度腳法兼備；今仗73分鐘後備登場，即時製造唔少威脅，更驚喜係最後階段，能夠冷靜絕殺對手。
曼聯今仗用安東尼馬迪爾打單箭頭，拉舒福特、般奴費南迪斯、艾蘭加支援，卡斯米路、艾歷臣任雙防中。
富咸冇出阿歷山大米祖域，用前熱刺中鋒卡路士雲尼斯奧斯攻堅，雖然搶到唔少攻勢，部分仲極有威脅，但遇上迪基亞又上身，救出多個攻門，真係冇佢符。
富咸防線谷得比較上，畀到曼聯突擊機會，14分鐘更逼甩對手腳下球，即時快速反攻，般奴費南迪斯傳遠柱，艾歷臣後上剷入空門，曼聯領先1:0。
富咸今仗發揮出色，倒戈嘅丹尼爾占士大打身價波，59分鐘後備入場，僅2分鐘即近射破網扳平，之後多次發揮速度優勢，利辛度馬天尼斯都頂佢唔住。
但富咸未能再入波之餘，到補時3分鐘，反被加拿祖、艾歷臣一次互傳入楔搞掂，加拿祖發揮高速，喺兩名富咸後衞中間突入，再射遠柱入網，取得個人英超第一個士哥，絕殺富咸，入波後更複製美斯同C朗除波衫show名嘅經典動作，今次唔使再驚畀阿根廷前輩阿古路話佢淨係掛住C朗，當美斯冇到啦！
事實上，加拿祖3月初曾獲阿根廷徵召，可惜最終都係落選今屆世界盃大軍，不過坦哈格都好睇重佢，賽後寄語加拿祖要腳踏實地、專注同投入，希望佢嚟緊多啲機會，成為國家隊嘅常規成員啦。
