喺轉會市場仲未有著落嘅曼聯，尋日正式開操，新帥坦哈格第一日返工，當然以身作則，比開操時間早兩粒鐘到達卡寧頓訓練基地，同足足20年冇返過曼聯嘅助教麥卡倫，一齊到場打點。
由於早前有偉大嘅歐國聯上演，有份出戰嘅球星可以遲啲先歸隊，不過都仲有大約30位球員出席首課操練，包括拉舒福特、辛祖、迪基亞、馬迪爾、雲迪碧克、梳爾等一隊成員，以及一班青年軍。
坦克第一課都係訓吓話，同球員做吓身體檢查，等班大帝來回跑旭吓咁，據曼聯官網講，首課大約兩粒鐘就搞掂。
據以往荷蘭傳媒及英國《每日郵報》報導，坦克係極度嚴格嘅魔鬼教練，枝水擺歪咗都唔得，要你擺番好啲嗰隻，嚟到曼聯，坦克除咗指定卡寧頓嘅草長係15mm，更頒佈咗一個失傳咗好耐嘅柯打：「飯聚令」！
以往費格遜年代，曼聯眾將每次收操後，都一定要一齊食完飯先走得，費爵爺咁做，就係希望佢哋多啲時間相處，變得更團結。自從爵爺退休後，「飯聚令」已名存實亡，好多球員一收操就即閃，約朋友又好、返屋企吔飯都好，總之就唔會留多一秒。
據指，坦哈格覺得曼聯自從爵爺退休後一沉不起，個個接手「咪一X樣」，最關鍵原因就係唔團結，既然佢哋心目中嘅「毒瘤」普巴已經走咗，所以要求重新執行「飯聚令」，等班大帝對耐啲、團結啲。至於有冇效，就真係開季先知喇。
