尋日係英超提交25人名單嘅日子，由於絕大部份球隊都大局已定，唯獨曼聯仲有懸念，加上近期負面新聞不絕，自然成為球壇焦點。
曼聯名單中，先後被3名女子指控襲擊、被勒令無限期延遲歸隊嘅安東尼，依舊順利入圍，球迷並不意外，始終安東尼獲坦哈格力撐，加上證據暫時仍不算充足，一旦證實清白，安東尼幾可肯定會即時重返大軍陣容，同格連活特嘅情況唔同。
反而曾公開指責坦哈格嘅查頓辛祖，竟然榜上有名，就令唔少球迷大跌眼鏡。辛祖早前發表「千字文」向坦哈格宣戰，指責坦克話佢操練表現差係講大話，似乎離隊已成定局，不過經過早前破冰會面後，辛祖已將原本置頂嘅反擊文刪除。
除咗破冰會談，另一位翼鋒安東尼被下令無限期延遲歸隊，亦係辛祖入圍嘅原因之一。始終曼聯近期傷兵滿營，坦哈格當然唔想冇埋辛祖，加上曼聯會方打算再安排另一次會面，CEO李察阿諾及總監梅托主動加入談判，要求二人尋求修補關係嘅方法。
呢份英超名單除咗有安東尼、辛祖，就連雪櫃兵雲迪碧克都有份。前荷蘭國腳雲迪碧克轉投曼聯後，一直長坐冷板，早前落選歐聯名單。至於其餘新兵包括安拉拔、伊雲斯等亦已順利註冊。
根據英超規定，25人名單當中，非本土培養球員不得超過17人。本土培養球員係指該球員喺21歲生日之前，不論國籍，曾喺英格蘭或威爾斯球會註冊的3季。而21歲以下嘅球員，係唔計入名單，球會可以隨意派U21球員出戰。呢份名單會保留至明年1月，亦即冬季轉會窗開啟。
