艾寧夏蘭特周日有重要任務，首度參戰曼市打吡，到時必定成為曼聯防線眾矢之的。夏蘭特雖然已夠成熟，但仍然不斷增值，喺呢場舉世矚目大戰前進行右腳特訓，務求集齊武器，幫曼城殺退宿敵。
開季7場英超入11球，射手榜一枝獨秀，難怪好多人認為曼市打吡嘅最大關鍵，係曼聯中堅華拉尼、利辛度馬天尼斯，能否嘜死夏蘭特。
入波能力超高、速度夠爆，同隊友配合度未去到最好，但都已經好高水平，夏蘭特以中鋒嚟講，可以話近乎完美。但佢並冇自滿，以實際行動，不斷自我強化。
夏蘭特擅長左腳，右腳雖然未至於生蟲，但威力差好遠；仲効力多蒙特嗰陣，已得到德國名將薛基拿為佢制定一套訓練計劃，苦練唔擅長嘅右腳，令佢更加全面。薛基拿司職前鋒，上世紀90年代効力拜仁慕尼黑，轉型做教練後做過慕遜加柏、多蒙特同薩爾斯堡助教，經驗豐富。
有名師制定特訓，夏蘭特右腳能力有所提升，但仍然有進步空間。喺曼市打吡前，夏蘭特又再進行右腳特訓，就睇吓可唔可以用呢隻腳射死紅魔。
點先可以嘜死夏蘭特？曼聯名宿史譚賽前獻計，作為紅魔一代中堅，說話自然有份量。史譚認為，要對付神鋒，必須用車輪戰消耗佢體力：「曼聯防守一定要主動，搶到波就送去曼城後場，同時要繼續盯實夏蘭特，限制佢發揮，唔好畀佢有埋門起腳機會。
「當然，最有效方法，就係進行針對性防守，曼聯可以安排一個防守中場纏住夏蘭特，或者採用車輪戰術，消耗夏蘭特體力。」星期日晚9點曼市打吡，就睇吓坦克會唔會接納史譚嘅方案，定還是有其他招數招呼夏蘭特啦！
