艾寧夏蘭特首次參與曼市打吡，再次殺神上身，除連中三元，仲有兩次助攻，當曼聯防線透明，半場已領先4球咁多，曼城最後主場贏6:3，只落後榜首阿仙奴1分。
艾寧夏蘭特爸爸，當年為曼城効力時，喺曼市打吡上陣，畀曼聯隊長堅尼惡意粗暴攔截重傷長抖，球員生涯自此一落千丈。廿多年後，兒子首度參戰曼市打吡，意義自當非常，老竇親身入場觀戰，見到艾寧仔展示巨星水準，摧毀紅魔，自然雙重興奮。
大戰當前，曼聯依然收起卡斯米路，同C朗同列後備，用麥湯米尼、艾歷臣做雙防中。防守線中堅係華拉尼、利辛度馬天尼斯，馬拉西亞、達洛治做左右閘。同前4場勝仗比較，幾乎同一班中後場，一對曼城即打回原型，徹底崩潰。
4連勝過程，以穩守突擊打垮利物浦、阿仙奴，另加球員打爭氣波嘅無比鬥志，但今仗明顯怯於對手氣場，開波即被圍揼，防守線非常不穩，僅8分鐘即失波，菲爾科頓接應貝拿度施華橫傳，禁區內快射入網。
曼城強大中前場線越踢越順，跟住係艾寧夏蘭特表演時間，34分鐘空中制霸，接應奇雲迪布尼角球，力壓麥湯米尼、達洛治，頭槌破網；3分鐘後，奇雲迪布尼又魔幻傳球，長傳後柱盲眼位，夏蘭特一個精彩臥射，曼城領先3:0。除咗入波，仲要助攻，夏蘭特44分鐘靚傳菲爾科頓建功，令曼聯上半場竟然吞夠4蛋，難怪好多曼聯躉睇完半場即走人，費事眼冤。
安東尼馬菲奧斯56分鐘射入世界波，為曼聯破蛋，但防線始終頂唔住，曼城一㩒掣，又輸多兩粒，夏蘭特64分鐘又以雄渾體力爆破，完成帽子戲法，72分鐘又成功助攻，就造菲爾科頓連中三元。後備馬迪爾完場前入兩球，3:6完場，總算輸得冇咁難睇。
3入球2助攻，夏蘭特配合中場強大能量，徹底摧毀曼聯防線。無止盡魔鬼級演出，8場英超入14球，連續3次主場連中三元，創造英超紀錄，已進入無人能擋境界，下周末主場對修咸頓，又睇吓佢會入幾多球。
Offfttt… What a day at the Etihad!! Manchester is BLUE 😍💙💙💙💙 pic.twitter.com/N6wRokVUxP
— Jack Grealish (@JackGrealish) October 2, 2022
據統計，夏蘭特、菲爾科頓係近52年首、兩位，於頂級聯賽嘅曼市打吡，能連中三元嘅曼城球員，上一位係法蘭西斯，佢喺1970年打吡完成帽子戲法，幫助曼城作客4比1擊敗曼聯。
C朗今仗列後備，未有上陣，場邊見到新世代神鋒光芒四射，應明白世代始終會交替。只要做好自己，專心比賽，已經好足夠。
