【英超】曼城3:1反勝賓福特!科頓帽子戲法 哥帥:佢好似把刀一樣!

預咗你,梗等埋你!科頓頓周二凌晨英超大演帽子戲法,帶領曼城作客反勝賓福特3:1,升上第二位,落後榜首利物浦兩分,但少踢1場。藍月亮主力傷兵已經好番晒,可以全力衞冕,睇嚟又可以有排贏喇!

艾寧夏蘭特傷癒重返正選,配合祖利安艾華利斯、貝拿度施華、科頓、奇雲迪布尼,曼城擺出豪華攻堅陣容,上半場控球率超過70%,射門17次,但反而係先落後嘅一隊。

賓福特門將費根攻守都有料,佢先後飛身救走艾華利斯、基爾獲加遠射,更於21分鐘炮製助攻,開出龍門球畀慕比從中路突圍而出射入,領先1:0。曼城喺上半場補時3分鐘追平,賓歷頭槌解圍不遠,科頓心口控定後射入,1:1完半場。

換邊後53分鐘,迪布尼又交出精準傳中,科頓近門頂入,曼城以2:1反超前。科頓仔今場狀態大勇,70分鐘,佢同艾寧夏蘭特打互傳,以速度突破後射入,完成帽子戲法兼奠定勝局。

23歲嘅科頓仔今季聯賽已有8入球7助攻,總計所有比賽為曼城貢獻11個入球同9次助攻,勢必刷新個人單季最強數據,成為哥迪奧拿爭標最重要武器之一。

哥帥賽後,當然讚到科頓仔天上有地下無:「佢喺狹小空間內嘅移動能力真係好出色,而且仲有入波同助攻能力,你好難搵到呢類型嘅球員,佢好似把刀咁,非常有侵略性。」