【英超】曼城1:1和車仔 11連勝終結;入球機器失靈 哥帥:我冇資格批評

殺神今場好唔掂!周日凌晨英超,艾寧夏蘭特9射0入球,糟蹋三個大餐士,曼城只能主場1:1迫和車路士,繼續排第3,失分又多過利物浦。

11連勝終結之後,曼城24戰53分,榜首利物浦25戰57分,阿仙奴25戰55分。第4及5位係阿士東維拉、熱刺,同樣25戰,有49及47分。

曼城今仗形勢理所當然佔優,有70%控球率,射門次數係31:9,但只能驚險搶番1分,其中主因係艾寧夏蘭特敗家,以佢卡士,有兩個頭槌都應該頂爆網,結果都錯失良機。

車路士自知冇得硬撼,大打穩守突擊,發揮得唔錯,積遜、史達寧錯失單刀機會,終於喺42分鐘由史達寧近門射成1:0。曼城要直到83分鐘,先至由洛迪卡斯簡迪追和。

賽後領隊哥迪奧拿冇責怪夏蘭特,反繼續鼓勵佢:「錄得9次射門梗係好啦,下一場比賽,佢就會入波喇!我做球員11年只係得11個入波,我好難向一位前鋒畀建議喎。」

阿仙奴勁呀,繼6:0大炒韋斯咸,又以5:0贏般尼,連續兩場作客共入11球兼0失球,以最弗狀態進入爭標關鍵階段。5個入球來自薩卡(兩球)、馬田奧迪加特、托沙及夏維斯。