「你大鑊喇，方丈份人好小器㗎！」前曼聯領隊雲戈爾出名記仇，佢對曼聯嘅憎恨程度難以用筆墨嚟形容，除咗明寸抽水，雲戈爾仲付諸行動，用佢荷蘭國家隊領隊嘅身份，再一次成功攔截，令熱刺翼鋒貝雲積轉投阿積士，拒絕曼聯嘅邀請。
貝雲積喺前年以2500萬鎊身價，由PSV轉投熱刺，處子戰即有入球，助熱刺以2比0擊敗曼城，仲被評為該場MVP，絕對係一鳴驚人。可惜之後左足踝嚴重受傷，復出後跌晒Watt，加上換帥、古路斯夫斯基來投，令貝雲積出場機會大減，今季熱刺仲買埋李察利臣，離隊似乎係唯一出路。
貝雲積腳法好、速度極高，雖然喺熱刺得唔到重用，但依然係荷蘭領隊雲戈爾愛將，絕對有一定級數。荷蘭媒體De Telegraaf報導，幾間英超球會、當中曼聯同愛華頓都出價4000萬歐元，希望將佢收歸旗下，阿積士出價較低（據稱為3000萬歐元），但CEO雲達沙親自打畀熱刺老細，誠意搭夠，熱刺最終接納報價，而貝雲積本人，則意外地揀咗阿積士。
講真，貝雲積曾經喺阿積士青年軍受訓，而且去到阿積士肯定係正選，加上有歐聯踢，除咗人工之外，吸引力係大過轉投曼聯嘅，而最重要一點，係雲戈爾嘅「忠告」。
雲戈爾不止一次強調，要代表荷蘭踢世界盃，一定要喺正常嘅球會踢正選，之前原本幾乎已落實加盟曼聯嘅後衛添巴，就因為同雲戈爾「傾完偈」之後，打消轉會念頭。而荷蘭媒體報導，貝雲積同樣喺徵求雲戈爾嘅「建議」後，揀咗阿積士。
公道啲咁講，雲戈爾係攔咗上面兩個啫，對於法蘭基迪莊，雲戈爾係冇「反建議」，方丈仲話迪莊去到曼聯應該都係正選，全世界等緊佢嘅決定，或者佢真係擔心添巴同貝雲積入魔後冇得落場，所以先攔嘅啫。
雲戈爾喺2014至16執教曼聯，但在任期間不斷被插，管理層更公然喺方丈在位之時，嘗試同摩連奴眉來眼去，令雲戈爾覺得不受尊重，種下難以釋懷嘅仇恨。
雲戈爾喺早前向外公佈患前列腺癌，帶埋荷蘭出戰年底世界盃後，就會退休、專心養病。
