利物浦夠狠，唔怕推倒重來，以年輕人迎接未來挑戰。繼沙迪奧文尼離隊後，唔爭在放走埋另一攻擊核心沙拿，標價7000萬歐元（約5.8億港元）。
文尼轉投拜仁後，一般預計，利物浦會盡力挽留沙拿，但結果相反，領導層企得好硬，拒絕沙拿同佢經理人團隊加薪6成、去到周薪40萬鎊嘅要求，以免打破薪酬架構；而且一不做二不休，若有球會出7000萬歐元，就可以帶走沙拿，而且仲有價講，始終法老王明夏約滿，到時可以自由轉會，利物浦一個仙都收唔到，只要有球會出價，紅軍收順啲亦合情合理。
利物浦咁狠，唔怕兩大攻擊核心一齊走人嘅主因，係見到上季中由波圖來投嘅哥倫比亞國腳路爾斯戴亞斯，又後生（25歲）又好波，擔到大旗有餘，新球季又已經買入烏拉圭中鋒達雲紐尼斯（23歲）及天才翼鋒法比奧卡華路（19歲），加埋迪亞高祖達，全部都係年輕高汁嘅攻擊球員，令利物浦領導層對未來好有信心，不如趁機賣埋沙拿，以免出年人財兩失。
沙拿如果離隊，會去邊隊？原本最大機會去皇家馬德里，7000萬歐元對皇馬嚟講唔係問題，兼且門當戶對，買唔到麥巴比，搵法老王頂檔亦唔算太失禮，只不過上月歐聯決賽前，沙拿口口聲聲復仇報仇，點知仇就報唔到，反被皇馬球迷當成笑柄同仇人，若然皇馬唔出手，有錢佬紐卡素又按兵不動的話，仲有邊間豪門肯掟咁多錢，去買一個30歲、出年完約兼人工咁高嘅球員？
除咗沙拿，日本國腳南野拓實亦離隊，法甲摩納哥主帥基文迪證實，南野即將加盟，轉會費1500萬歐元（約1.3億港元）。雖然係上季英聯盃、英足盃冠軍主力，但英超176分鐘上陣時間，南野拓實同利物浦一樣，已到咗要作出改變嘅時刻。
