一場番晒嚟！曼聯盡地一煲，收起C朗、麥佳亞，主場打出水準，以2:1擊敗利物浦，取得今季首場勝仗。紅軍冇神冇氣、表現水準以下，新季踢咗3場仲未開齋，前景堪憂。
曼聯開季兩連敗，仲要輸得大大殼；利物浦唔好得幾多，兩場和波都係追落後。雙紅會要爭今季首場勝仗，令呢場經典對決更緊張。
閃電買咗卡斯米路，但仲未出得，曼聯領隊坦哈格等佢唔切，生死關頭放膽一搏，收起C朗、出20歲艾蘭加，拍辛祖、拉舒福特攻堅；收得C朗，唔爭在聽取民意收起埋麥佳亞，用華拉尼、利辛度馬天尼斯打中堅。
利物浦想變都好難變，傷兵一大籮，達雲紐尼斯坐波監，用番法明奴打前鋒，老將占士米拿要做正選中場，佢拍住佐敦軒達臣、哈維艾利洛，完全冇創造力、亦唔夠硬淨，連麥湯米尼都搶唔贏。
跌到最谷底，曼聯冇退路，打得非常進取，球員勤力走動，同之前兩仗成強烈對比；前鋒線活力增加，艾蘭加表現最醒神，9分鐘射中柱後，16分鐘又放甩阿諾特，左路地波傳中，辛祖門前先fake一嘢，再冷靜轉身射入，曼聯先開紀錄。辛祖呢球處理出色，C朗喺後備席都拍爛手掌。
冇出麥佳亞，曼聯防線睇落係穩陣咗，但同利物浦前鋒冇料到亦有關係。法明奴完全回晒塘，沙拿上半場未上力，路爾斯戴亞斯孤掌難鳴。成個上半場，利物浦最有威脅攻門，係來自般奴解圍失誤，喺白界線省中L馬。
除咗路爾斯戴亞斯夠搏又質高，其他利物浦球員都冇厘神氣，占士米拿係搏晒老命，但英雄遲暮已成事實，就連VVD都不穩，53分鐘又輸快攻，畀拉舒福特射成2:0。
曼聯領先兩球後縮後踢，利物浦搶番較多攻勢，沙拿追成較接近紀錄，C朗末段亦入替福仔。曼聯最終保住2:1勝果，自2018年3月10號後，首次喺英超贏出「雙紅會」。
曼聯依家可以透啖氣，壓力去晒只得2和1負嘅利物浦身上。傷兵多係事實，但好多紅軍球員跌watt、後備力量極為疲弱亦係事實，唔夠硬淨更加係今場死穴。
當然，文尼離隊嘅影響已顯而易見，冇咗個最佳連繫人，中場一輸就冇得翻身，之前兩場已暴露問題，今場對住踢出水準嘅曼聯，結果想谷亦有心無力。睇番傷兵名單，有級數嘅創造型中場只得艾簡達拿一個，經過今場波，利物浦真係要考慮吓買人，加強番後備力量同創造力。利物浦下場將會喺主場對般尼茅夫。
