肥梳真黑仔！今季表現突出的勞基梳爾，剛與曼聯續約，卻在今晨英超受傷，可能要休息一段時間，令球隊雖然以1:0擊敗賓福特，仍然蒙上陰影。
曼聯上仗不敵紐卡素，一度被紐卡素及熱刺超越，跌至第5位，下季未必能夠參戰歐聯，故今仗勝果更形重要。領隊坦哈格雖然偏愛荷蘭自己友，今仗亦終於屈服，收起入波能力不足的前鋒韋格賀斯，用回拉舒福特做單箭頭。
紅魔今場比較主動，27分鐘，沙比薩二傳予拉舒福特建功，打破自己及球隊近3場聯賽入球荒。這亦是拉舒福特今季第10次於英超射入致勝球，成為自2009/10年球季的朗尼後，單季斬獲最多致勝球的紅魔球員，真正關鍵先生。
不過，曼聯37分鐘受打擊，勞基梳爾受傷退下火線，他直接步入更衣室，似乎傷勢不輕。這位英格蘭國腳今季為曼聯射入1球及6次助攻，又可以客串中堅，而且他亦是曼聯陣中較為穩定的球員，其受傷缺陣，勢必影響領隊坦哈格調兵遣將。
曼聯贏波後，28戰累積53分，暫時以3分優勢反超前熱刺兼踢少一場，但得失球差大幅落後紐卡素21球，僅守住第4位。
