利物浦真係好輸得，甚至係完全冇止瀉跡象，周六英超作客狼隊，又勁吞3隻光蛋，冇咗VVD嘅防線，繼續90分鐘放題任食。
踏入2023，利物浦打咗4場聯賽，除咗賽和同樣落難嘅車路士，對賓福特、白禮頓以至狼隊，除咗輸波之外，合共失咗8球，只係入得1球，攻守大崩潰。如果唔係阿士東維拉主場2比3不敵李斯特城，利物浦已可能跌至第11位。
雲迪積克繼續養傷，祖高美斯、麥迪比合作扼守中路，恐怖程度超乎想象，冇互補默契之餘兼發夢，開波12分鐘已失兩球，先係麥迪比擺烏龍，之後門前任頂任射，畀剛由韋斯咸轉會嘅後衞奇治戴臣，於禁區內大腳抽入，狼隊領先兩粒。
除咗後防唔掂，中場亦完全唔夠力，冬季轉會窗又冇補強，同樣打433陣式，今仗拍埋魯賓尼維斯領導嘅狼隊中場度，明顯唔夠砌。
鋒線方面，加普繼續冇料到，高普唔用可能係陣中最弗嘅哈維艾利洛，沙拿低沉亦預咗，達雲紐尼斯下半場走到靚位，難得有個單刀機會，可惜又射落狼隊門將荷西沙亞身上。
入唔到波好快有「回報」，轉頭冇耐，狼隊中場搶截得手，立即快攻，「筋肉人」查奧爾再施展驚人速度，右路突破傳中，魯賓尼維斯於祖高美斯、馬迪比中間瀟洒穿越，一控即射，狼隊最終贏夠3比0。
利物浦危難之際，嚟緊仲有3場大戰，2月14號周二凌晨，默西賽德郡打吡對愛華頓，拖肥糖換帥後即爆大冷贏阿仙奴，將以強大氣勢對同市宿敵，絕對有得打。
跟住19號作客紐卡素，直情變成下風波，仲有22號歐聯16強首回合對皇家馬德里。以目前情況，利物浦隨時3月中歐聯次回合後，今季餘下比賽，全部變成例行公事，可以提早諗吓下季點換血。
